拍到最后一场收到医院电话 黄秋生:其实系等紧时间

黄秋生同张松枝今日到葵涌接拍港台消防剧集《火速救兵IV》,剧中秋生饰演消防总长,所以戏份唔太辛苦,戏份以指挥工作为主,秋生表示因家事关系,原先推掉拍摄,但被副导诚意打动接拍。
秋生受访时透露母亲入院,所以本来打算辞演。问到妈妈现时情况?秋生话:「都唔会冇乜事。妈妈身体唔系太好,噚晚收到医院电话,连最后一场都拍唔到就要赶去医院。」是否老人病?秋生面色一沉:「好多病,我都唔知仲有乜,肾功能退化,透唔到气同去唔到水,我估只剩听觉同触觉,睇唔到,讲唔到,冇乜意识,其实系等紧时间。」
秋生坦言心情都冇得惊,每个人始终要面对身体每日衰退,仲话其实人生本来就无时无刻要面对死亡,问到三个儿子有否探望嫲嫲?秋生话三个仔都喺外国读书:「见咗都唔知啦!只系想见我。」
秋生指妈妈情况有少少影响工作心情,现时唯一希望她能舒舒服服安详离开。早前喺澳洲拜祭父亲一事妈妈都唔知情,至於会否再为父亲择风水再葬?秋生话:「算啦!排队都排唔到我,上面仲有个家姐同大佬,我系阿四,同埋已成定局,依家安安稳稳就算。」咁会唔会去多啲澳洲同亲人联系?秋生话:「嗰度啲风水几好,又牛又羊又草,不过去多啲我冇嘢捞㗎喇。」记者表示可以考虑去澳洲发展,秋生话:「你都傻嘅,要去都去荷李活啦!」
对于岳华离世,秋生今早听到消息,印象中同对方喺亚视时同演过一部剧,佢话:「佢好好人㗎,好有礼貌,冇架子又唔会摆款。」秋生仲有感而发:「其实如果有留意,你会发现依家系一个时代嘅转变,包括好多地方拆卸、好多商舖嘅消失、好多人嘅消失、好多嘅习惯消失,其实已经系整整一个时代冇咗㗎喇,所以依家成日讲话『狮子山精神』,呃人㗎!冇咗㗎喇。依家要搵返个新嘅嘢,嗰啲咩『狮子山精神』、『以前乜乜乜』,以前嗰啲死咗㗎喇!」